ازاي افرق بين الكورونا والبرد الموسمي؟

🔴 الاعراض اللي عند ابني دي كورونا ولا برد عادي ؟! اعرف ازاي ؟!

نركز بقى في اللي جاي :

✋🏼 اولا عشان نطمن الامهات :

1. فيروس الكورونا بالذات و على عكس باقي الفيروسات التنفسية بيجي بصورة اخف جدا في الاطفال مقارنة بكبار السن
2. حالات الاصابة في الاطفال اللي اقل من ٥ سنوات نادرة جدا ،، و ده معناه ان الاطفال في المرحلة العمرية دي محميين بصورة طبيعية (السبب غير واضح حتى الان) و مش بيلقطو العدوى بسهولة زي الكبار
3. معدل الوفيات في الاطفال اقل من ١٠ سنوات بسبب الكورونا = صفر ،،

صفر فعلا ،، لم يسجل اي حالات وفيات بين الاطفال في العالم بسبب الكورونا (عكس الانفلونزا العادية و غيرها من الفيروسات الاخرى المسببة لعدوى الجهاز التنفسي) ،، مش بس كده .. شوف رقم ٤

1. الفيروس لما اصاب طفل حديث الولادة (عنده ١٣ يوم بس) ماحتجش اي علاج نهائي و لم تظهر عليه اي اعراض تقلق ،، و خف منه من غير اي تدخل طبي
   يبقى مبدأيا نطمن كده على ولادنا لأن ان شاء الله معدل الخطورة عليهم منخفض جدا حتى مقارنة بالانفلونزا العادية 🔴 طيب نجاوب على السؤال : كورونا ولا مش كورونا ؟
2. اهم عرض لازم يصاحب مريض الكورونا اللي هتظهر عليه اعراض المرض (مش الحاملين اللي مش هتظهر عليهم اعراض اصلا) هو ارتفاع درجة الحرارة ،، (٩٨.٩٪؜ من مصابي الصين – ١٠٠٪؜ من بمصابي باقي دول العالم)

مفيش كورونا من غير سخونية ،، طفلك اللي مخنفر و بيكح طول ما هو مش بيسخن يبقى ان شاء الله منقلقش

1. اهم تاني عرض هو الكحة الجافة (Dry cough) اللي موجودة في ٧٥٪؜ من المصابين …

التاريخ المرضى لمعظم المصابين بيكون عبارة عن ارتفاع في درجة الحرارة لمده كام يوم ،، يليه كحة جافة ،، كحة ببلغم حاجة نادرة نسبيا مع مريض الكورونا و عمرها ما تكون هي اول الاعراض ،،

1. عكس دور البرد و الانفلونزا لسبب مش معروف تأثير الفيروس اقوى ما يكون بيكون على اغشية الرئة فقط و اكثر بكتير من تأثيره على باقي اغشية الجهاز التنفسي ،،

فاعراض الرشح و الخنفرة و المناخير السايبة بتطمنا اكتر و تقول ان الطفل غالبا عنده برد عادي جدا ،، في واحدة من الدراسات بتقول ان الرشح كان موجود في ٤٪؜ فقط من المصابين !

ابنك اللي بيخنفر ان شاء الله عنده برد عادي جدا زي اللي بيجيله كل سنة ،، اطمني ،، مش كورونا

1. إلى الان ،، الغالبية العظمى من المصابين بيه لازم يتوفر فيهم شرطين : ١.كان ليهم تاريخ مرضي بالسفر للدول الموبؤة أو: ٢.الاختلاط مع اشخاص مصابين ،، عدد الحالات اللي اكتشفوها بدون ما يتوفر فيهم الشرطين دول نادرين جدا و يعدو على اصابع اليد الواحدة ،،

فلو حضرتك مش بتاخدي كل فترة جولة سياحية (tour) بتلفي فيها على الصين تطلعي منها على كوريا و تقضيلك بعديها يومين استجمام في ايطاليا او فرنسا ،، يبقى نسبة ان الاعراض اللي بيعاني منه ابنك دي تبقى كورونا تقترب من الصفر ،، الكلام ده الى الآن ،، و ان شاء الله تفضل كده و ان كان مش اكيد هتفضل

طيب انا كده اطمنت ،، اقلق امتى بقى ؟!

⛔️ اعراض الخطر :

1. كحة جافة مستمرة اكتر من ٥ ايام و معندناش حاجة تفسرها يصاحبها ارتفاع في درجة الحرارة
2. صعوبة في التنفس و نهجان
3. تغير في لون الشفايف الطبيعي الى اللون الازرق
4. همدان شديد و عدم القدرة على بذل اي مجهود مع تكسير في الجسم
5. فقدان شديد للشهية مع صعوبة في البلع
6. اضطراب في درجة الوعي

الخلاصة ،، الموضوع بالنسبة للاطفال مش مقلق خالص ،، انتي تقلقي على ابنك من الانفلونزا العادية اكتر بكتير من الكورونا ،، خنفرة و رشح زي الموجودة عند كل الاطفال طول السنة و لا نحطها في بالنا ،،

نغسل ايدينا كويس بالصابون باستمراو و نداري بقنا و مناخيرنا و احنا بنكح و نعطس (المفروض ان كلنا بنعمل كده) و نبعد عن التجمعات في الاماكن المغلقة و ان شاء الله كلنا هنبقى في السليم