ازاي تشتري بطيخة مش قرعة🍉
ازاي نشنري بطيخة مسكرة 😂😍🍉🍉😍😍
أولا: كقاعدة عامة في شراء الفاكهة عموما، السلامة الخارجية أول حاجة تبص عليها .. متشتريش فاكهة قشرتها متعورة أو مكسورة أو مقطوعة أو فيها بقع مشبوهة أو طرية زيادة عن اللزوم او ناشفة زيادة عن اللزوم .. ولازم حبة الفاكهة مهما كانت يبقا شكلها قياسي .. يعني التفاحة شكلها تفاحة مش موزة .. والموزة على هيئة موزة مش على هيئة ميكي ماوس .. والبطيخة مش مكعبة!
ثانيا: بالنسبة للبطيخ .. فيه شكلين من الاستدارة .. فيه بطيخة مطيولة بيضاوية الشكل وبطيخة كاملة الاستدارة شبه الكورة.. بنتكلم عن البطيخ العادي مش النمس .. العادي فيه مطيول ومكور .. المطيولة مليانة مية والمكورة مسكرة .. المطيولة اسمها البطيخة الدكر والمكورة اسمها البطيخة النتاية .. اشتري النتاية ما استطعت
ثالثا: البقعة الصفرا .. كل بطيخة بتنمو على الأرض .. ومكان ركنتها على الارض بيبقا لونها اصفر .. بس الأصفر درجات يا سيدي .. اشتري البطيخة اللي البقعة الصفرا فيها غامقة مش فاتحة
رابعا: سرة البطيخة .. البطيخة بتتقطف من العرق اللي ماسكها من الطرف اللي فيه الزر البارز ده .. الزر ده لازم يبقا دبلان مش اخضر .. الزر الاخضر الطازة ده معناه ان البطيخة على الأرجح قرعة .. لازم الزر يبقى دبلان ومستوي وراشق لجوة مش بارز لبرة لأن دي علامة اكتمال النضج
خامسا: متتخمش في البطيخة اللي البياع قاسمها وحاططها على العربية .. هتلاحظ ان البطيخة دي لونها احمر زي الدم ولو فتحت اي بطيخة تانية على العربية مش هتلاقي اللون ده ابدا .. البطيخة دي بالذات حمرا جدا علشان محطوط عليها صبغة طعام اسمها اللعلي ودي مسألة ماركتينج بس .. انما مش حقيقية
سادسا: خبط على البطيخة بكف ايدك .. ده من الطقوس اللي بتعملها من غير ما تفهم سببها .. بس ابوك عملها زي ما جدك عملها وانت هتعملها وأحفادك هيعملوها .. بيقولوا ان الصوت المكتوم معناه ان البطيخة مليانة مية والصوت الرنان معناه انها ناشفة .. بس اتحداك لو عرفت تفرق من الصوت بس .. بس لازم تخبط وتسمع كأنك بتكشف على خزنة قبل ما تفتحها
سابعا: مش بالحجم .. متشتريش اكبر بطيخة موجودة .. البياع هيحاول يديهالك اول واحدة .. ولا تشتري اصغر بطيخة .. خير البطيخ الوسط .. ولو مسكت بطيختين بنفس الحجم اختار التقيلة اللي فيهم علشان دي اللي خيرها كويس
ثامنا: البطيخة اللي فيها جروح لونها بني على بشرتها الخارجية .. دي علامة جودة مش عيوب .. اه والله .. جرب الفرق وانت تشوف .. دي بتبقا بطيخة مسكرة